BUBUKA

Pun……sapun !

Palias ngiruhan girang

Di leuwi ki papantunan

Gelik suling jeung sonari

Galindengna angin laut

Awuhan gending kahéman

Keclak ibun nu maruntang

Dina tungtung dangdaunan

Pependeman

Tutungkusan

Iraha jeung rék ku saha

Galurana lambak sagara carita

Teuleumaneun kojayaneun

Nu neundeun reujeung sampeureun

Nu nunda reujeung téangeun

Banda ki Sunda

Garapeun saha ?

Mun teu ti kiwari arék iraha ?

Mun teu ku urang rék ku saha ?

Sampura…..isun

Paralun ka nu boga lalakon

Bisi nyaur teu ka ukur

Bisi nyabla teu ka ungang

Da sakieu pangabisa

Lain puraga tamba kadenda

Palias ngiruhan girang

Sok komo narajang alas

Paralun….!

Jero galur paluruhan

Bisi teu keuna kuma kuduna

Paralun….!

Mun téa mah medar carita

Udar tina tali gadang

Mun téa mah nurat

Nyolédat teu napak kana gembatna

Amit ampun, paralun !

Puuuun………sapun !